The love that I hae chosen,
I'll therewith be content;
The saut sea sall be frozen
Before that I repent.
Repent it sall I never
Until the day I dee;
But the Lawlands o' Holland
Hae twinn'd my love and me.
My love he built a bonny ship,
And set her to the main,
Wi' twenty-four brave mariners
To sail her out and hame.
But the weary wind began to rise,
The sea began to rout,
And my love and his bonny ship
Turned withershins about.
There sall nae mantle cross my back,
Nor kaim gae in my hair,
Neither sall coal nor candle light
Shine in my bower mair;
Now sall I choose anither love
Until the day I dee,
Sin' the Lawlands o' Holland
Hae twinn'd my love and me.
Noo haud your tongue, my daughter dear,
Be still, and bide content;
There's ither lads in Galloway;
Ye needna sair lament.
O, there is nane in Galloway,
There's nane at a' for me.
I never lo'ed a lad but ane,
And he's drown'd in the sea.